tarixin yadigarıTuğun sərvətləri
Tuğ kəndi Azıx və Tağlar paleolit düşərgələrinin yaxınlığında yerləşir. Bu arxeoloji ərazilərin həm Azərbaycan, həm də dünya tarixində xüsusi yer tutması isə danılmaz faktdır. Azıx mağarasında aparılan arxeoloji qazıntılar zamanı 350-400 min il əvvələ aid qədim insanın alt çənə sümüyü aşkar edilib ki, bu da ərazidə insanların uzun müddət məskən saldığını təsdiq edir.
Digər müxtəlif abidələr də Tuğ ərazisində qədim sivilizasiyaların mövcudluğundan xəbər verir və kəndin qədim köklərini və tarixi əhəmiyyətini vurğulayır. VIII əsrdə yeparxiya mərkəzi olan Gtişvəng monastır kompleksinin ərazisi XIII əsrdə genişlənərək Qafqazın ən məşhur monastır komplekslərindən birinə çevrilmişdir. Başqa bir mühüm memarlıq abidəsi Quruçay üzərində XVIII əsrdə tikilmiş Tağlı körpüdür. Tuğ kəndinin ərazisində yerləşən üç qədim xristian məbədindən ən qədimi olan Müqəddəs İohan məbədindən isə kənd ərazisinə və ətraf dağlara heyranedici mənzərə açılır.
Kəndin tarixi irsinin bərpası və qorunub saxlanması üçün son illərdə müəyyən addımlar atılmışdır. Belə ki, 2023-cü ildə Qarabağ bölgəsinə xas olan memarlıq üslubunu qorumaq və Tuğu mədəni turizm destinasiyası kimi təbliğ etmək məqsədilə Tuğ Dövlət Tarix-Mədəniyyət və Təbiət Qoruğu yaradılmışdır.
